Philemon - Scripture Earth

Paul ꞌen Ndi Dustlꞌus
ꞌI Philemon Yutsꞌun
Kꞌeꞌanguz
Paul ꞌen Philemon dahooja yúlhni
1 Si
Paul ꞌustꞌah. ꞌEt Sizi Gri ba tsakꞌesída. ꞌEt Timothy nelhutsin,
ꞌen chah sulh ꞌintꞌah. Philemon nyun ntsꞌun kꞌeꞌtesgus. Nelhutsin,
bukꞌetsꞌintsiꞌ inli ꞌinkꞌez nelh ꞌutꞌen inli. 2 ꞌEt ndun Apphia ꞌen chah
bukꞌetsꞌintsiꞌ. ꞌInkꞌez Archippus ꞌen chah neꞌaBá ba nelh nehughan
unli. ꞌInkꞌez nkoo Yakꞌusda ba ꞌilhunahuwúdulh, ꞌen tsꞌiyawh dahooja
hubutsꞌutni. 3 Yakꞌusda neꞌaBá ꞌinkꞌez Sizi Gri neMoodihti, ꞌen ye unzoo, ꞌi
ꞌinkꞌez nuhwhudzi dooghel, ꞌi nohwhulh ꞌóotꞌe.
4 SuYakꞌusda
Sizi Gri mba ꞌalhaꞌ ꞌintꞌah ꞌinkꞌez bukꞌentsiꞌ
schanailya dusni. Tenadusdli totsuk nghu nuní nuszut.
ꞌúdustsꞌo Sizi Gri mba ꞌalhaꞌ ꞌintꞌah ꞌinkꞌez bukꞌentsiꞌ. ꞌEt dune
Yakꞌusda bubeꞌildzun, ꞌen chah whuz naꞌa zeh hubukꞌentsiꞌ. 6 ꞌEt huwa be
mba ꞌalhaꞌ hoontꞌah, ꞌi be whútnih wule. ꞌEt Christ, Sizi tsꞌutni, ꞌen bugha
ꞌutꞌen unzoo, ꞌi bugha ꞌintꞌen, ꞌet tꞌeoonoodzeh. 7 Sulhutsin nyun ngha
dune Yakꞌusda bubeꞌildzun hubudzi nduk náꞌuja. ꞌEt huwa be nékꞌetsꞌintsiꞌ,
ꞌi íntꞌi, ꞌi bugha tube tsꞌuhóontꞌi ꞌinkꞌez sóo kꞌunuznutꞌah chaꞌ tsꞌintꞌah.
5 Whulh
Paul ꞌen Onesimus yuba tedudlih
8 ꞌEt hoh Christ ꞌen be khunekti be ntsꞌun hukwaꞌ dusni hoh tuneꞌ ontꞌen. ꞌEt
whuz naꞌa tsꞌahꞌun naꞌa neꞌóntꞌen. 9 ꞌEt huwa be nekꞌétsꞌintsiꞌ, ꞌi bugha ntsꞌun
tedusdlih. Sunilhꞌen ntsꞌe naꞌa dastꞌah ye ꞌun uzulh usdli. ꞌInkꞌez kꞌan ꞌet Sizi Gri
ꞌen ba tsakꞌedsída. 10 Suyeꞌ Onesimus ꞌen ba ntsꞌu tedusdli. ꞌEn ꞌintꞌah nke da ꞌutis
tlꞌool be sulhghel hoh buba ꞌalhaꞌ hoontꞌah sulhsi. 11 Whutsꞌun da nyun ntsꞌun
ꞌaw hoonli huba unzoo hoolah inle. Kꞌan ꞌet nyun ꞌinkꞌez si suba chah unzoo suli.
12 kꞌan ꞌet ꞌen ntsꞌun natélhꞌalh ꞌinkꞌez naóolchoot. ꞌEt ꞌantsꞌi sichꞌoh sudzi ilhchoot
liꞌtanilh. 13 Njan suzih tedalh hukwaꞌ nuszun inle, njan khunek unzoo, ꞌi bugha
436
The New Testament in Southern Carrier of Canada, 1st ed 2002, © 2012, Wycliffe Inc.
437
Philemon
sulhghel. ꞌEt da nyun ngha sunat neꞌóotꞌen wule da. 14 ꞌEt whuntsꞌih nyun, “A,”
chaduzinih tꞌeh zeh, ꞌaw hoonli ꞌuwhuteslilh hukwa chaꞌnuszun. ꞌEt whuz naꞌa
nyunchꞌoh hooníntꞌi tꞌeh zeh. 15 ꞌEt huwa tulih ꞌastlꞌiyaz nghu whinya inle. ꞌEt sih
ꞌilhuz wheni naóolchoot tꞌeh, ꞌilhuz nzih wúda. 16 ꞌAw ꞌo ꞌun nye ꞌulhna chatesdle.
ꞌEt kꞌan ꞌet ꞌulhna unli degha nus ꞌintꞌah. Nelhutsin bukꞌetsꞌintsiꞌ unli. Si tube suba
dézti ꞌet whuntsꞌih dalcho ꞌi be suba nyun ꞌo nus mba dézti. ꞌEt náwhultꞌah, ndi
yun kꞌut huba chah ꞌinkꞌez neMoodihti ba chah.
Si skꞌunaꞌa nailchoot
17 Si
nyulh ꞌústꞌen suninzun tꞌeh, si nasilchoot hukwꞌu naꞌa naóolchoot.
ndun hoonliyaz hoh ntsꞌun tíntaꞌ ꞌantꞌen tꞌeh, kꞌus butsꞌun whuzilhꞌai
tꞌeh, si suba ꞌukꞌuneꞌonguz. 19 Si, Paul, sichꞌoh sula be ntsꞌo kꞌeꞌusges.
Si bukꞌelha hólhsilh. ꞌEt whuntsꞌih hoonliyaz mba whunatelhúnih,
nyunchꞌoh be khina, ꞌi be whuntsꞌi, ꞌi be ntseꞌ ꞌustꞌi liꞌhoontꞌah. 20 A,
sulhutsin neMoodihti be nyun ngha ꞌo nus hoonzoo ntsꞌoh hukwaꞌ
nuszun. Ntsꞌe naꞌa suyuh tsꞌih hoꞌ dusni, ꞌet neMoodihti be sudzi soo
naꞌinleh. 21 Ntsꞌó kꞌeꞌusges, ꞌi bukꞌunaꞌa ꞌutenilh suba ꞌalhaꞌ hoontꞌah.
Daja dusni, ꞌi be ꞌo nus ꞌutantꞌilh nuszun. 22 ꞌEt whuntsꞌih ntsꞌe tesdalh
suba lhaóodonleh. Ntenadudli bugha ꞌet ndoh honeh. ꞌInkꞌez ntsꞌun sula
nahudootnih.
18 ꞌEt
23 Epaphras
Ye unzoo, ꞌi nyulh ꞌóotꞌe
ndun Sizi Gri bugha sulh tsakꞌesda, ꞌen chah dahooja
nyulhni. 24 Mark, Aristarchus, Demas, ꞌinkꞌez Luke ꞌen chah, sulh
ꞌuhutꞌen, ꞌen tsꞌiyawh dahooja nyuhútni. 25 NeMoodihti Sizi Gri ꞌen ye
unzoo, ꞌi nyégha bulh ꞌóotꞌe. ꞌEt ndoh honeh.
The New Testament in Southern Carrier of Canada, 1st ed 2002, © 2012, Wycliffe Inc.